Joh 13 | WSK | STEP | Passover ko tom biya pingi aram, mu ukurukse iwita. Se Jesus ikiam ko tom ali imi bitiruk ale Nuet kote namurukko mu tai pingi aram mu ko ikiam. Nu noko kariimet ali ewere te nunga kua lagakaso mu eng me menaram, am biyala nunga kuakaso.

John 13

Jesus olekem nusuwik anuwam

1 Passover ko tom biya pingi aram, mu ukurukse iwita. Se Jesus ikiam ko tom ali imi bitiruk ale Nuet kote namurukko mu tai pingi aram mu ko ikiam. Nu noko kariimet ali ewere te nunga kua lagakaso mu eng me menaram, am biyala nunga kuakaso.

2 Turom bainga ningi nu olekem arungu na no se animan. Se Satan maingkala Judas, Iscariot kari Simon ko namar, wore ikia tuam, nu Jesus kager kari nuguting te bitirukko. 3 Jesus nu ikiam Nuet sokel suen la nu tuam mu ko ikiam, ale nu Nuet ilak baga tairam ale Nuet kote namoso mu ikiam. 4 Butata se nu dagiwa barasam ale ko guang maiya mu kutuwu beteram ale guang bo tam luan kaolam. 5 Asele yu taiwir bo ningi waram ale olekem nusuwik anuwa duap beteram, ale guang luan te kaolam mu te yu bugulik kagarukaso.

6 Ale Simon-Peter kote aratam se Peter nu isuam, “Kari Biya, ni aninga asiwik anupko e?”

7 Se Jesus nu maonam, “Mel aitakta ani betesam mu ni ko duap me ko ikisam. Bare udagi te ikiko.”

8 Bare Peter nu maonam, “Ni aninga asiwik me anupko nunguningkiri!”

Se Jesus balam, “Ani nika siwik me anuwek, mu ni aninga bo mena.”

9 Se Simon-Peter nu maonam, “Kari Biya, aga asiwik la me anupko! Aga agiting asupuling ago anupko!”

10 Bare Jesus nu maonam, “Kari kumik likilim guram, mu nu udagi kumik likilim biya me gurok, suwik la anuwok ale nu karur mena. Se nina karur mena bagasan. Bare nina ningi bo karur ago.” 11 Jesus maingkala kari nu kager kari nuguting te bitirukko mu ko ikiam ale uwuta balam.

12 Nu nusuwik anu kutuwuram mu nu ko guang tam tugumam, ale peleram kuwim te nama daigam, ale isam, “Nina mel ani aitakta ningimik te beterem mu ko nunguning ko ikiman agi mena?” 13 Ale balam, “Nina aninga arusan ‘Kausa Kari’ masan, ‘Kari Biya’ masan mu diram aga arusan. Mu awuk, ani bortanga. 14 Se ani nenenga Kari Biya, nenenga Kausa Kari mu nisiwik anuwem, se nina ninimi nisiwik te anuwalko. ^{▼▼John 13:14-15 Ana Jesus beteram turan betenakko: Mat 20:28; Luke 22:27; Phil 2:5; 1 Peter 2:21.} 15 Ani ninga kausem ale ningimik te beterem se aringiman turantala, ninimi ningimik te beteralko. 16 Ani nunguningta nunguning ninga manorsam, ura kari mu ko kari biya kiara me ikiso. Se kari den maona se ago geraga mu ko kari nu beteso se taiso geragoso mu kiara me ikiso tala. 17 Se nina aitakta den imi ikiman. Ale karo tual mu asele ninguru amilmilaralko.

18 “Ani nina suen la me ninga balsam. Kari ani nunga balem mu nunga ikiwasam. Bare Kaem ko batoga te den bo iwita balso, ‘Kari ani agarak wete na nam mu buring gurugu aisam,’ ma balso, se den mu ko nunguning aratukko. ^{▼▼John 13:18 Psalm 41:9.} 19 Ani girem mel imi ko ninga manorsam. Se mel mu aratuk, mu nina Ani awiriya mu aga ikialko ^{▼▼John 13:19 Greek den te “ego eimi” aniso, se ko nunguning mu “ani bagasam”: Exodus 3:14.}, ale te ani ago ko nengemang ningi nunguning arukko. 20 Ani nunguningta nunguning ninga manorsam, awiriya nina namaral se nengerak amilmilurukko, mu ani ninga beterem se namaman mu ago amilmil aisiso. Se awiriya ani amilmil aisiso, mu nu Kari aga beteram se tairem mu ago amilmil tuso.”

Judas Jesus kager kari nuguting te bitirukko

21 Jesus den mu balu kutuwuram mu nu noman biyala batagakaso, ale wetang te balam, “Ani nunguningta ninga manorsam, nina ningi bo ani kager kari nuguting te aga bitirukkowo!”

22 Se ko olekem nu awiriya ko balukaso mu ko ngualaman, ale nunumi nomotam arikasan. 23 Olekem bo Jesus ko ninguru kuakaso mu Jesus kumik duap te daigam bagakaso. ^{▼▼John 13:23 John kota numi balso: John 19:26; 20:2; 21:7,20.} 24 Buta se Simon-Peter papon te olekem mu auram ale maonam, “Awiriya ko balso wore ko isaruko,” mam. 25 Se olekem mu Jesus kote yera namaram ale isuam, “Kari Biya, awiri ko balsam?”

26 Se Jesus balam, “Ani bread na kumin te iluwek ale tuek umutang kari borta.” Asele nu bread tam ale na kumin te iluwam ale Judas, Iscariot kari Simon ko namar, wore tuam. 27 Se Judas na mu tam mu Satan tairatela noko kumik gomang te tairam.

Se Jesus Judas maonam, “Mel ni bitarko mu tairatela bitarko.” 28 Bare kari dagi se animan mu bo ta den Jesus nu maonam ko nunguning me ikiman. 29 Judas nu manga bitaruwara ko kari, se nuna ikikasan nu Passover na bo diarukko agi kariimet nungumik mel mena wore nunga mel i diarukko Jesus balam se namoso ko iwita balman. 30 Judas bread mu tam ale tairatela watingi aratam. Se turom batagam.

Jesus munan iru olekem alo nungaram

31 Judas aratam namaram se Jesus balam, “Aninga tom tai aratam,” mam, “se Kaem nup biya Kari ko Kuriang tuokkowo. Se nu kumik te mel aratuk mu te Kaem aking nup biya taukko. 32 Se Kaem nup biya tauk mu tom katirta nu aking kota ko nup biya ko Namar tuokkowo. ^{▼▼John 13:31-32 Kaem nup biya Jesus tuokko: John 17:1-5.}

33 “O aninga kuriang, ani kam maiya biya me nengerak bagirikko. Ani ninga bitirik namirik se nina aga loagaralko, bare ani Juda supuling nunga manem turantala ani ninga manorsam, nina ani te namirik mu te namaralko me terong mam. 34 Aninga munan iru ningarsam: ninimi ko kueralko. Ani ninga kuakasam turantala, ninimi ko kueralko. ^{▼▼John 13:34-35 Ana nainimi ko kuenakko: John 15:12; Eph 5:2; 1 John 3:11.} 35 Nina ninimi ko kueral mu te kariimet suen la ikimon mu nina aninga olekem ma ninga balmonko.”

Jesus Peter buring tuokko wore ko balam

36 Se Simon-Peter nu isuam, “Kari Biya, ni namasam masam bare aparete namarko?”

Se Jesus noko den koma balam, “Ni ani apareyate namasam mu aitak agowom karo ale te namarko me terong, bare udagi mu asele ni am te namarko.”

37 Se Peter nu isuam, “Kari Biya, aninga angamang ani ni kewom karowa am kuerikko! Bare awuk se ni aitak ani kewom me karikko balem?”

Se Jesus balam, “Se ni nunguningta ani ago ko kuar i? Ani nunguningta nunguning ka manorsam, tarak me niaruk la, ni biring ani aisu ale tom ilagala suwan ko balu, ni ani me aga ikisam ma balukowo.” ^{▼▼John 13:38 Peter Jesus buring tuokko: John 18:27.}

38